Uppgjör – Söguleg spenna í Monte Carlo

 

Fyrsta umferð heimsmeistaramótsins í ralli, Monte Carlo rallið fór fram síðustu helgina í janúar. Aðeins 2,2 sekúndur skildu að fyrsta og annað sætið eftir alla fjóra keppnisdagana. Keppt hefur verið í Ölpunum fyrir ofan Mónakó síðan 1911 og aldrei hefur slagurinn um fyrsta sætið verið svona jafn.

 

Það voru heimamennirnir Sebastian Ogier og Julian Ingrassia sem höfðu betur gegn Thierry Neuville og Nikulaus Gilsoul. Sigur Ogier var hans sjötti í röð í furstadæminu og var Frakkinn afar hamingjusamur í lok ralls.

 

Nýr bíll, sömu úrslit

 

Ogier og Ingrassia snéru aftur til Citroën fyrir tímabilið en frönsku ökuþórarnir kepptu fyrir M-Sport Ford síðustu tvö ár. Þeir hafa unnið heimsmeistaratitilinn sex ár í röð, tvisvar fyrir M-Sport og fjórum sinnum á Volkswagen Polo.

 

Franska áhöfnin hóf ferilinn hjá Citroën árið 2009 en fóru yfir til Volkswagen árið 2012. Þetta var því í fyrsta skiptið sem þeir keyra Citroën C3 rallýbílinn í keppni.

 

Með sigrinum í Monte Carlo sannaði Ogier enn og aftur að bíllinn skiptir ekki jafn miklu máli og ökumaðurinn í WRC. Citroën lenti í síðasta sæti í keppni bílasmiða í fyrra á meðan Ogier vann á Ford. Nú er Ford liðið í miklu basli á meðan Citroën er á toppum.

 

Þriggja bíla slagur um fyrsta sætið

 

Rétt eins og í fyrra voru það Thierry Neuville og Nikulaus Gilsoul ásamt Ott Tanak og Martin Jarveoja sem börðust við Ogier og Ingrassia um sigur.

 

Neuville og Gilsoul á sínum Hyundai höfðu tækifæri á að ná forystunni í rallinu á öðrum degi er þeir völdu betri dekk en Citroën áhöfnin. Örlítil mistök þeirra við gatnamót á sjöundu sérleið urðu til þess að Ogier hélt forystunni.

 

Í ralli þar sem bil milli bíla er yfirleitt mælt í mínútum frekar en sekúndum var gríðarleg spenna fyrir ofurleiðina, síðustu sérleið keppninnar. Þá var Thierry Neuville búinn að minnka forskot Ogier niður í 0,4 sekúndur.

 

Bilið í þriðja sætið var mun meira. Ott Tanak og Martin Jarveoja enduðu rúmum tveimur mínútum á eftir fyrsta sætinu. Þó var finnska áhöfnin mjög hröð á malbikinu í Monte Carlo og náðu til dæmis besta tíma á öllum sérleiðum laugardagsins. Ástæða fyrir tímatapinu var brotin felga á föstudeginum.

Bragi Þórðarson

Skildu eftir svar